नेपाली खोज
मङ्लबार, मंसिर १६, २०७७
  • होमपेज
  • बाँकेमा कोरोनासँगै बाढीको खतरा बढेको छ

बाँकेमा कोरोनासँगै बाढीको खतरा बढेको छ

  • आइतवार, असार ७, २०७७
बाँकेमा कोरोनासँगै बाढीको खतरा बढेको छ

राँझा, ७ असार: कोरोनाको जोखिम कम नहुँदै बाँकेमा बाढीको कहर शुरु भएको छ । राप्ती नदीमा पानीको सतह बढेपछि तटीय क्षेत्रमा डुबानको खतरा बढेको छ । पहाडी भेगमा लगातार भइरहेको वर्षाका कारण नदीमा पानीको सतह बढेपछि यहाँको राप्तीसोनारी, डुडुवा र नरैनापुर गाउँपालिकाको नदी नजीकका बस्ती डुबानको जोखिममा रहेको जिल्ला आपत्कालीन कार्य सञ्चालन केन्द्रका सूचना अधिकृत गौरी बुढाथोकीले जानकारी दिनुभयो ।

उहाँका अनुसार नदीमा बाढी आउनसक्ने भएकाले तटीय क्षेत्रका बासिन्दालाई सतर्क रहन आग्रह गरिएको छ । शनिवार रातिसम्म नदीमा पानीको सतहले खतराको तह पार गरे पनि अहिले घटेको छ । यद्यपि वर्षा नरोकिएकाले राप्ती नदीको बाढी गाउँमा पस्न सक्ने जोखिम बढेको छ ।

बाढीको सूचना प्रवाह गर्न राप्तीसोनारी गाउँपालिकाको बाढी मापन गर्ने गरिएको छ । कुसुमबाट राप्ती नदीको बाढी तल्लो तटीय क्षेत्रमा आइपुग्न करीब ४ देखि ५ घण्टा समय लाग्ने भएकाले कुसुममा पानीको सतह पाँच मिटर पुग्ने बित्तिकै खतरास्वरुप नदी छेउछाउमा साइरन बजाइन्छ ।

नदीको सतह पाँच मिटर ४० सेन्टिमिटर पुग्ने बित्तिकै राप्ती नदी आसपासका दर्जनौँ गाउँ डुब्ने गर्छन् । भारतले अन्तर्राष्ट्रिय नियम विपरीत लक्ष्मणपुर बाँध र कलकलवा तटबन्ध बनाएका कारण नदी प्राकृतिक रुपले बग्न नपाउँदा नेपाली भूभाग डुबानमा पर्दै आएको छ ।

नदीमा फसेका ११ को उद्धार

राप्ती नदीमा आएको बाढीका कारण अलपत्र परेका राप्तीसोनारीका ११ जनालाई गए राति उद्धार गरिएको छ । राप्तीसोनारी–२ गौशालामा फसेका ६ र ललहीमा फसेका पाँचजनाको चार घण्टापछि उद्धार गरिएको बाँकेका प्रमुख जिल्ला अधिकारी रामबहादुर कुरुम्वाङले जानकारी दिनुभयो । गोठाला गएका उनीहरु चार घण्टा नदीको बीच टापुमा फसेका थिए । उनीहरुलाई सशस्त्र प्रहरीको टोलीले राति अबेर उद्धार गरेको हो । (रासस)

Facebook Comments

तपाइको प्रतिक्रिया दिनुहोस्

Your email address will not be published. Required fields are marked *

हामी तपाईंको इमेल अरू कसैसँग साझा गर्दैनौं।

ट्रेन्डिङ

धेरै कमेन्ट गरिएका