नेपाली खोज
आइतवार, अशोज ४, २०७७
  • होमपेज
  • गण्डकी प्रदेशमा बन्दाबन्दी गर्नुपर्ने अवस्था छैन, मुख्यमन्त्री पृथ्वीसुब्बा गुरुङ

गण्डकी प्रदेशमा बन्दाबन्दी गर्नुपर्ने अवस्था छैन, मुख्यमन्त्री पृथ्वीसुब्बा गुरुङ

गण्डकी प्रदेशमा बन्दाबन्दी गर्नुपर्ने अवस्था छैन, मुख्यमन्त्री पृथ्वीसुब्बा गुरुङ

कास्की, २७ साउन: गण्डकी प्रदेशका मुख्यमन्त्री पृथ्वीसुब्बा गुरुङले प्रदेशमा कोरोना भाइरस सङ्क्रमण बढे पनि लकडाउन (बन्दाबन्दी) गर्नुपर्ने अवस्था नरहेको बताउनुभएको छ । नेपाल आदिवासी जनजाति पत्रकार महासङ्घ (फोनिज)को २१ औँ स्थापना दिवसका अवसरमा आज फोनिज गण्डकीले आयोजना गरेको ‘कञ्चन पत्रकारिता पुरस्कार, अक्षयकोष घोषणा तथा पुरस्कार वितरण’ समारोहमा उहाँले नागरिकस्तरबाट सचेतना अपनाउँदा धेरै हदसम्म सङ्क्रमण नियन्त्रण हुने बताउनुभयो ।

प्रदेश सरकारले आफ्नै साधन स्रोतबाट कोरोना व्यवस्थापन गरेको बताउँदै मुख्यमन्त्रीले भन्नुभयो, “लकडाउन फेरि लगाउनुपर्दछ भन्ने अवाजसमेत उठेको छ तर अहिले हतारमा निर्णय गरेर फुर्सदमा पछुताउने समय होइन, खोलिसकेको कलकारखाना, निर्माण व्यवसायका काम बन्द गर्ने भनेर सोचेका छैनौँ, हतारो गर्र्नु पनि हुँदैन । हामी सचेत होऔँ त सङ्क्रमण धेरै कम हुन्छ ।”

सत्तारुढ नेकपाका स्थायी कमिटीका सदस्य समेत रहनुभएका मुख्यमन्त्री गुरुङले कोरोना भाइरससँग लडिरहेको अवस्थामा अहिले पार्र्टीभित्रको भाइरसले दुःख दिएको टिप्पणी गर्नुभयो । जनताको बीचमा स्थायित्वका लागि गरेको बाचा पूरा गर्न र हालसम्म कुनै पनि सरकारले पाँच वर्ष कार्यकाल पूरा गर्न नसकेको विगतबाट पाठ सिक्दै इतिहास निर्माणका लागिसमेत पाँच वर्ष दायाँ÷बायाँ गर्न नहुने उहाँको भनाइ छ ।

कोभिड–१९ का कारण समस्यामा परेका पत्रकारलाई प्रदेश सरकारले कुनै पनि सहयोग गर्न नसकेको स्वीकार गर्दै मुख्यमन्त्री गुरुङले चालू वर्षमा पत्रकारको सशक्तीकरणका लागि रु ६५ लाख बजेट विनियोजन गरिएको जानकारी दिनुभयो । गण्डकी प्रदेश पर्यटनको मात्र राजधानी नभई यहाँको पत्रकारितासमेत राम्रोसँग चलेको छ भन्ने सन्देश दिनुपर्ने खाँचो उहाँले औँल्याउनुभयो । आन्तरिक मामिला तथा कानून मन्त्रालयका सचिव केदारनाथ शर्माले पत्रकार महासङ्घसँग मिलेर सञ्चारसँग सम्वन्धित कार्यक्रम कार्यान्वयन गरिने र पत्रकारको क्षमता विकासमा सघाउने प्रतिबद्धता व्यक्त गर्नुभयो ।

दुई सञ्चारकर्र्मी पुरस्कृत
फोनिजले सञ्चालन गरेको कञ्चन पत्रकारिता पुरस्कारबाट पोखराका पत्रकार रुद्रबहादुर थापा तथा बाग्लुङका पत्रकार राजेशचन्द्र राजभण्डारी पुरस्कृत हुनुभएको छ । मुख्यमन्त्री गुरुङ, फोनिजका प्रदेश अध्यक्ष एमवी आस्थामगर तथा पुरस्कारका संस्थापक विमलमान गुभाजूलगायतले उहाँहरुलाई सम्मानपत्रबाट सम्मान गर्नुभएको छ । पुरस्कारको राशी जनही रु २५ हजार नगद रहेको छ ।

पत्रकार थापा तथा राजभण्डारी तीन दशकदेखि पत्रकारितामा क्रियाशील रहनुभएको छ । कार्यक्रममा फोनिजका प्रदेश इञ्चार्ज हुमबहादुर गुरुङ, पत्रकार महासङ्घ कास्कीका अध्यक्ष दीपेन्द्र श्रेष्ठ, प्रतिभा छनोट समितिका संयोजक सुरेन्द्र थापामगर, फोनिज महासचिव रुद्र श्रीसमगर र पुरस्कृत व्यक्तित्व थापा तथा राजभण्डारीलगायतले पछाडि परेका र दबिएका आवाजलाई पत्रकारिताको माध्यमबाट समाजमा स्थापित गर्न सक्नुपर्नेमा जोड दिनुभयो । पोखराका व्यवसायी गुभाजूले आफ्ना स्व माता÷पिताको स्मृतिमा फोनिजले सञ्चालन गर्ने गरी पहिलो पटक पत्रकारिता पुरस्कार घोषणा गरी अक्षयकोषका लागि रु छ लाख हस्तान्तरण गर्र्नुभएको थियो । (रासस)

Facebook Comments

तपाइको प्रतिक्रिया दिनुहोस्

Your email address will not be published. Required fields are marked *

हामी तपाईंको इमेल अरू कसैसँग साझा गर्दैनौं।

ट्रेन्डिङ

धेरै कमेन्ट गरिएका