नेपाली खोज
बुधबार, साउन २८, २०७७
  • होमपेज
  • मुख्यमन्त्री गुरुङद्वारा बाढीपहिरो प्रभावित क्षेत्रको निरीक्षण

मुख्यमन्त्री गुरुङद्वारा बाढीपहिरो प्रभावित क्षेत्रको निरीक्षण

मुख्यमन्त्री गुरुङद्वारा बाढीपहिरो प्रभावित क्षेत्रको निरीक्षण

लमजुङ, १ साउन: गण्डकी प्रदेशका मुख्यमन्त्री पृथ्वीसुब्बा गुरुङले केही दिनयता आएको बाढीपहिरोबाट प्रभावित क्षेत्रको स्थलगत निरीक्षण गर्दै पिडीतलाई सान्त्वना दिनुभएको छ । गत असार २९ गते सोमबार आएको बाढीपहिरोले लमजुङको मध्यनेपाल नगरपालिकाका विभिन्न स्थानमा पु¥याएको क्षतिको बुधबार दिउँसोदेखि साँझसम्म स्थलगत निरीक्षण गर्दै मुख्यमन्त्री गुरुङले पिडीतलाई सान्त्वना दिनुभयो ।

सो बाढी तथा पहिरोले नगरपालिका वडा नं ६ रानीपानीगाउँका ३१, लामासोतीका २७, रातामाटेका २१, भदौरेका ११, गुम्बाबेँसीका नौ घरपरिवार विस्थापित भएका छन् । त्यस्तै सोही नगरपालिका वडा नं ३ सूर्यपालका पाँच, वडा नं २ प्रजालुटारका तीन, वडा नं ४ चर्दीका एक र वडा नं १ खवासगाउँका एक घरपरिवार विस्थापित भएका छन् । सिमपानी, रानीपानी र काउरेका स्थानीयवासीलाई सो नगरपालिकाको वडा नं ६ भोर्लेटारको इशानेश्वर माध्यमिक विद्यालयमा राखिएको छ । त्यस्तै कसैलाई आफन्तको घर र कसैलाई कतै सुरक्षित स्थानमा राखिएको छ ।

यी सबै क्षत्रको स्थलगत निरीक्षण तथा पीडितहरुलाई भेट्दै मुख्यमन्त्री गुरुङले भन्नुभयो, “दुःखमा हुनुहन्छ तपाईँहरु, तपाईँसँगै दुःखमा हामी सबै छौँ, प्रदेश सरकारले आवश्यक सहयोग गर्छ ।” मुख्यमन्त्री गुरुङले आवश्यक प्रक्रिया मिलाएर अघि बढ्न नगरपालिका, वडा कार्यालयलगायत सम्बन्धित निकायलाई आग्रह गर्नुभएको छ । उहाँले पहिरोपिडीतलाई भन्नुभयो, “जनतालाई समस्या भएको बेला सरकार हेरेर बस्दैन, घरजग्गा नभएकालाई बस्ने व्यवस्था तथा अन्य समस्या भएकाहरुको लागि समेत सरकारले सहयोग गर्नेछ ।” त्यस्तै प्रदेशका विभिन्न जिल्लामा समेत बाढीपहिरोले क्षति बनाएको यी सबैको व्यवस्था गर्नका लागि दुई महिना समय लाग्ने मुख्यमन्त्री गुरुङको भनाइ छ ।

सरकारी मापदण्ड नहँुदा बाढीपहिरोले गाउँगाउँका घरहरुमा बढी क्षति बनाएकाले दिगोरूपमा हुने गरी मापदण्डअनुसार घरहरु तथा बस्ती बसालेमा बाढीपहिरोको जोखिम न्यूनीकरण हुने मुख्यमन्त्री गुरुङको भनाइ छ । त्यस्तै उहाँले कोभिड–१९ सङ्क्रमण रोकथाम तथा नियन्त्रण र बाढीपहिरो पीडितलाई राहत तथा पुनःस्थापना तदरुकताका साथ गर्नलाई कार्यालय प्रमुखलाई निर्देशनसमेत दिनुभएको छ ।

त्यस्तै मध्यनेपालका बाढीपहिरो पीडितले मुख्यमन्त्री गुरुङसामु आ–आफ्नो दुःखेसो गरेका थिए । सिमपानीका बाढीपहिरो पीडित देवी कँुवरले भन्नुभयो, “सरकार मेरो त पहिरोले गाँसबास सबै सकाएर सुकुम्बासी भएँ, भएको एउटा घर, दुई रोपनी जग्गा, एउटा लैनोभैँसी र सात बाख्रा सबै पहिरोले लग्यो, अब हजुरले सहयोग गर्नुपर्छ, यसमा हजुरको सहयोग हुने विश्वास गरेको छु”, पहिरो पीडित कुँवरले भन्नुभयो । त्यस्तै विभिन्न पहिरोपीडितहरुले मुख्यमन्त्री गुरुङसँग आ–आफ्नो कुरा राख्दै मुख्यमन्त्रीले आफूहरुको समस्याको समाधन गर्नेमा आशावादी रहेको बताएका छन् ।

बाढीपहिरो स्थलगत निरीक्षणमा पुग्नुभएका गण्डकी प्रदेश सांसद तथा नेपाल कम्युनिष्ट पार्टी (नेकपा) गण्डकी प्रदेशका प्रमुख सचेतक मायानाथ अधिकारी, सांसद मधुमाया अधिकारी, धनञ्जय दवाडी, मुख्य न्यायधिवक्ता डा राजेन्द्र घिमिरे, नीति योजना आयोगका सदस्य डा विष्णुराज बराल, प्रमुख जिल्ला अधिकारी कृष्णप्रसाद शर्मा, सोही नगरपालिका प्रमुख रमेशकुमार पाण्डेलगायतले जनतालाई विपद् परेको बेला सरकारले छिटो समस्याको समाधन निकाल्ने विश्वास दिलाउनुभएको थियो ।

त्यस्तै मुख्यमन्त्री गुरुङले मध्यनेपालमा क्षतिग्रस्तस्थलको अनुगमन गर्नुअघि लमजुङ मनाङको एक मात्र बेँसीशहर–चामे सडकखण्डमा बाढीले पु¥याएको क्षतिको स्थलगत निरीक्षण गर्नुभएको थियो । गत असार २५ गते अर्थात् शुक्रबार सो सडकखण्डअन्तर्गत बेँसीशहर नगरपालिका–७ स्थित पुवाखोलामा बाढी आउँदा खोलामा राखिएको कल्भर्ट बगाएको थियो । ६५ किलोमिटरको लामो कञ्ची सकडको विभिन्न भागमा उक्त समयमा क्षति पुगेको थियो ।

त्यस्तै सोही समयमा अविरल वर्षाले घरभित्र पहिरो पस्दा मृत्यु भएका परिवारलाई प्रदेश सरकारले राहतसमेत वितरण गरेको छ । मुख्यमन्त्री गुरुङले मृतकका बुबा हर्कबहादुर र आमा कान्छी तामाङलाई जनही रु ५० हजारका दरले साढे एक लाख हस्तान्तरण गर्नुभयो । पहिरोले एउटै परिवारका ३३ वर्षीय दीपक तामाङ, उहाँकी श्रीमती २६ वर्षीया विमाया तामाङ र नौ वर्षीय छोरा छेवाङ तामाङको मृत्यु भएको थियो । प्रदेश सरकारले बाढीपीडितको पहिले उद्धार र राहत वितरणमा लागेको प्रदेश सरकारको भनाइ छ । (रासस)

Facebook Comments

तपाइको प्रतिक्रिया दिनुहोस्

Your email address will not be published. Required fields are marked *

हामी तपाईंको इमेल अरू कसैसँग साझा गर्दैनौं।

ट्रेन्डिङ

सम्बन्धित खवर

धेरै कमेन्ट गरिएका